Biografie

Antoinette Pienaar is in Carnarvon as een van vyf dogters gebore en het aan die Universiteit van Stellenbosch 'n graad in drama behaal. Daarna het sy 'n loopbaan as sangeres gevolg met landwye optredes waarin sy dikwels historiese heldinne, soos Krotoa van die Kaap, besing het. Die afgelope sewe jaar is sy vakleerling van oom Johannes Willemse op 'n afgeleë plaas in die distrik van Beaufort-Wes. Kruidjie roer my is haar eerste boek. Vir kruieraad skakel Antoinette weeksdae tussen 17:00 en 19:00 by 023 4161659.

Johannes Willemse is op die plaas Breekkierie in die Kenhardt-distrik gebore as die oudste van twaalf kinders. Hy het saam met sy broers hulle pa, ‘n stukswerkman, van plaas tot plaas gehelp walle stoot, ploeg, klipkrale bou en putte grawe. In die veld by die skaap het sy oupa Hansie hom die Griekwas se kennis van heling begin leer. Deur ‘n lewe van harde, gesonde arbeid heen het hy talle mense met dié kennis van die veld se helingskuns behandel.